為女死為女亡 為女去考狀元郎

A3/3/2

Sor for 1999,少少長
識我既就唔好篤我出黎啦…thx

你揀Jupas果陣既決定會跟足你一世…
十七八九歲既決定可以左右好多年人生…
最緊要唔好令自己後悔

首先我想聲明,其實我只係一個為女可以去到好盡既普通毒撚一名…鬱左幾年就俾我抒發下啦…

當年CE放榜,我成績係原校升中六既人入面只係高過中位數少少(利申: 當年中學係Band1尾),老實講我果陣對自己都幾失望,因為同預期低左幾分

然後話說本來我已經放棄左我女神架啦,以為佢會越洋讀書,另外又因為發生左好多事啦⋯但係最後佢都升左原校。果時本身好灰既我突然產生一個念頭:努力讀書,係AL黎個絕地反擊。

講就咁講,但係發奮努力既真正原因係…伯母係一個管教好嚴既人,對自己個女嚴,我相信(又或者係估)佢對未來女婿要求都會高;對於當時係毒撚既我(其實宜家都係)黎講,其中一個提升自己value既方法就係入神科。我目標果一科神科grad之後投身既行業就正正係伯母果行黎。可以話佢係幕前,我係幕後。我以“為佢既幸福同伯母既認同”依個虛無飄渺既目標奮鬥(少年你太年輕了),為左填補CE分數上既不足,我走鬼左去自修多科AL,為求拉返分。

然後時光飛逝,我放棄左好多興趣,由中五放榜個暑假開始日日0800-0000溫書(中六果陣係學校果個長期冇人用既自修室溫書真係幾lonely下…),四科PastPaper加埋做左一百一十幾年,話說果陣我個人都幾神經質,基本上就係洗自己腦:如果拎唔夠火箭就世界末日果類…仲俾老師捉左我去定期見社工⋯總之摺足兩年啦。我同女神關係?普通朋友囉,雖然都有一齊溫書⋯果時我只係識將讀書放第一位…

我仲記得放榜果朝我食早餐果陣已經開始肚痛(話說前一晚我冇訓,去左行夜山…反正唔會訓得著),入到課室開始手震腳震(今年放榜既dryers不妨食定胃藥…)。然後攞成績果刻,我就好似巴納吉打開拉普拉斯之盒一樣咁緊張。不過講定俾等放榜既你知,其實你拎份野果刻就會自然掃曬所有grade,人之常情黎,所以唔好期望自己可以一科科咁揭grade…
繼續講正題…
跟住…我衝左入男廁喊,果種激動の淚唔係話忍就忍到。我i左落個廁格門度,跟住副校長入左黎⋯(腐女唔好諗太多⋯)
「XXXXXX」
(內容大約係話我知學校請左記者黎)
(我心諗,我為左個女仔先咁努力姐,你請個記者黎關我○事咩…
當然最後我都只係同個記者講左啲行野啦, e.g. 夜晚會去食大餐慶祝果類, 雖則我最後係因為通左宵所以訓左成日…夜晚煮公仔麵…)

再叉開話題先,學校方面其實大朝早就收曬啲成績表,各個班主任亦應該一早偷睇曬所有人成績。其實老師佢地真係好Pro,無論係成績極好定冇咁好既,佢地偷睇完都會守口如瓶,好既老師甚至可能以經為你諗埋出路。

我當時諗都冇諗,就將果科神科放左係A1,Submit。
事實上我連GBus都入到…不過果陣既我年少氣盛,對於其他有錢途既Programme理都冇理過…
最後當然入到A1啦。

但係之後先係問題所在。或者大家留意到,我至今做既所有野其實只係自己單方面既努力(我冇同佢提過添…),我同女神一直都只係朋友,而且我做咩行業同女神like唔like我絕對係兩回事黎,甚至衰啲講句,我唔應該期望女神會因為我第時可以做份高人工既工而鍾意我。於是入左U之後久唔久都會有啲後悔揀錯科。我唔係讀唔黎,讀得唔差添,啲船仲多到離曬大譜,不過只係成日FF如果我當初冇因為佢而左右我Jupas選擇既話,果個平行時空會係點呢…

考Midterm/Final/做Intern果陣每次遇到大難關,我都會後悔:點解我要為左佢去到咁盡?點解要為一個可能徒勞無功既可能性而努力咁多年?又或者每次同女神之間有咩摩擦(雖然多數都係我諗多左)既時候都會後悔點解一開始唔揀自己有興趣既科呢?

就黎Grad,一方面諗: 我果行除左chur之外其實都真係好好前景(雖然又要考試又要OT, 做完Intern之後日日煲陀飛輪),另一方面又心諗: 如果我同女神最後真係冇結果(其實都幾大機會…),咁我以後做野既時候永遠都會記得自己曾經為左女神而浪費左好多青春…會後悔一世。睇怕都要轉行。

所以呢…
我覺得因為親人離世而做醫生果類勵志展開冇咩問題;屋企人希望你讀咩科果啲我就唔作評論啦;但係如果為左一個女仔/男仔而[特登]入某一科(e.g.一齊讀果類or入世伯/伯母公司果類,又或者我果種case, etc)…雖然真係好浪漫,但係我真係要奉勸大家:入到果科,但係同佢關係衰左果陣您就GG…

揀Jupas真係要三思而行…
(不過,入到大學,好多人都會成日話自己入左伏科架啦…)

後記
就黎同女神去旅行,唔知會唔會有好結果呢…

From 薄扶林大學 (HKU)

Comments

No comments yet. Be the first!

Leave a Reply