港大定中大好?

由細到大,入中大一直係我既夢想。放榜果日,我攞到個比我預期中高既成績,可以揀入港大定中大。

父母同老師一知道我成績就梗係叫我入港大啦,又話咩個名靚D呀易搵工D呀云云。但係我冇屈服,放左中大係A1,港大係A2,雖然兩間都有in,但最後中大收左我。

話就話條路係自己揀,但我唔可以話我冇後悔過。

首先,我讀果科係揸兜科黎既,咁我都知道呢科黎講,港大係好過中大。雖然港大同中大話就話係叮噹馬頭,但事實係,你同人講你讀港大,人地會「嘩!」,你同人講你讀中大,人地會「哦!」。呀媽時不時又會攞返出黎講,話我第時待遇比HKU Grad 低唔好怨,我雖然有當面駁返佢,但裡面始終都有放係心上。話就話興趣最重要,但選對了興趣,前途都好重要。

另外,我最後悔既係信左好多所謂既stereotype。港大學生又點點點,中大學生又點點點,港大好咩咩,中大好咩咩,相信大家都聽過唔少,但係咪真呢,就真係要入到大學自己體驗過先知。如果你以為我入到中大發現中大好差,對唔住並唔係咁,我好欣賞中大既好多野,我只係接觸多左HKU既文化同學生,發現有好多所謂既定型根本就唔存在,同埋港大比我想像中美好得多。HKU 有既問題,CU 都會有。HKU學生睇人睇你champ唔champ?唔好意思,CU 既學生唔好得去邊。話就話兩間大學既HALL 文化好唔同,但住黎住去又咪係兩三個人同一間房,相處唔黎多數係性格既問題,唔係大學文化既問題;你問我就最好不過啦。

雖然我係跟從左自己意願,但入到大學並唔係事事如意。而每當有不如意,都怨自己點解當初唔信下老師同父母,揀一間比較好既大學?而呢D 埋怨多數係assignment period 既時候出黎。(被拖走)

如果重來一次,我都唔知自己會揀HKU定CU。但我而家就絕對唔會話自己無悔。點解唔為自己前途諗下,做個好d既選擇呢?

最後,想同而家睇緊dry club 既中六生講:興趣固然重要,但你真係要認真諗諗你既信心會唔會動搖。

From 馬料水大學 (CUHK)

Comments

No comments yet. Be the first!

Leave a Reply